Hoe om jou gras op die korrekte manier te sny

Om ʼn dik, welige grastapyt te verkry, is dit noodsaaklik om jou gras op die korrekte manier te sny. Geen plant, struik of blom sal goed lyk met ʼn grasperk wat rondom dit doodgaan nie!

Voordat die gras gesny word, moet die volgende belangrike reël in gedagte gehou word – die gras moet met sowat een derde verkort word. Dit beteken dat indien die gras 6 cm lank is, moet dit gesny word sodat die gras uiteindelik 4cm lank is. Die optimum lengte van ʼn grasperk is rondom 2 tot 3cm. Indien die gras te kort gesny word, mag die grasperk uitdroog. Na die gras gesny is, moet dit genoegsame water kry – ten minste 10 tot 15 liter per vierkante meter.

Ons gebruik hier twee tipes grassnyers – die tradisionele tipe en die sogenaamde deklaag-grassnyer. Die deklaag-grassnyer tel nie die gras op nadat dit gesny is nie, maar sny dit fyn en gooi dit terug op die grasperk. Op hierdie manier word jou grasperk sommer outomaties bemes elke keer nadat jy die gras gesny het.

Hierdie sort grassnyers is egter nie geskik wanneer jy ʼn swembad het nie, aangesien die gras in die swembad sal beland. Hier is dit dus beter om van ʼn tradisionele grassnyer gebruik te maak – een met ʼn houer daaraan vas wat die gras optel.

Daar is ook gekombineerde grassnyers beskikbaar waar mens kan kies of jy die houer wil gebruik, al dan nie. Hierdie grassnyers is geskik vir grasperke met ʼn helling van 15°. Indien jou grasperk op ʼn steilte is, moet jy handsnyers gebruik wat ook geskik is vir plekke waar ʼn grassnyer nie maklik kan bykom nie, soos rondom blombeddings, rondom bome of die rante van die grasperk.

««« Vorige artikel: Die aanplant van ʼn nuwe grasperk Volgende artikel: Wat om met gesnyde gras te doen »»»

Saterdag 13.11.2010 20:13 | Druk | Grasse