Lalan hé tabaub ‘kisu fue?

Uaka‘ ntom nêô ‘kisu fue i ka parlu fa hé utonan ki. ‘Kisu i kaun ana, mnaonta alaha mili 3 ai 4, nabê tsêun sin nbi dapur.

Kisu ana alêut i nmôên nbi fue nanan. Fuekin humaf me-me msat nmui kaun ana i –fue buncis –’kisu fue buncis, fue polong – ‘kisu fue polong, miju-miju – ‘kisu miju-miju ma lele fue buncis – ‘kisu lele fue mhb …

Nbi lé fue amleutin, ho mubé mupên bolpunuf ana fun kaun anasin mo’éta. Oras lé ‘kisu naekin pôê nako téonin, bolpunfin taét sin nbi fuekin. ‘Kisu fe ésat nmoé nalê‘ôn fuesin oras lé tauatsin (fun ntom nok in lôêmta), més oras nfafé nbi lele msat ‘kisu inkin môên nataub bén nbi fuekin.

Més hit uaka naléok, fun hitat mui lalan hét hoen ‘kisu sin i nobatém (haumak 100% mê‘ô!)

Tsêô talaél fue mnaot in, hit musti lab-lab boé tan sin ma hôê sin talan méot, ma ta‘etsin lek-leko hé kaisa nmui fue atoman ‘kisu. Pôlên lé fue apunuf sin oké (nalekon fin muhôet man sin). Oke ma mutam sin nbi kantong plastik ai abas ma uatsin nbi kulkas nanan nan leku 48. Paék lalan i, ho mubé mufek man ‘kisu in môenta.

Mupôên mulaélsin nako kulkas, mhôê muméot sin nan neno 2–3. Hom sat mubém uatsin nbi kantong plastik talan téa in orsa ho hém paéksin. Fini mauatin mpaék lalan i alaha nabê ntom ‘kisu nako fini masosin nbi toko.

Fun lasi i, nalekon fin hom uat fue fini nbi botêl nanan ma sun mutaubsin. Fin’in i musti nméot léko lé mauatin, kalu kahat lofan pun. Onat ma ho mubé palsai kalu ho fin’in lof kan tom fa ‘kisu.

‘Kisu amnekun fue taufin msat tabê hoen sin paék lalan és lé tamit fini alekotsin –nako spesies mak ‘kisu kan lôêm sin fa.