Пестованє нового травняка

Найлєпши час за правенє нового або дошеванє старого травняка од мая по юний, алє зоглядом же тот рок бул окреме слаби цо ше паданьох дотика, погодни час за шаце будзе аж у юлию.

1. правенє нового травняка Место на хторим жадаце направиц нови травняк прекопце до глїбини 10–15цм. Поверхносц жеми вировнайце и пороляйце зоз ролю.

Далєй маце два можлївосци:

a) пошейце травняк Перше вимерайце поверхносц на хторей жадаце зашац нови травняк. Вирахуйце кельо вам потребно нашеня, рахуйце же вам на 1 m2 потребно 25ґ нашеня за шаце + додайце на кажди 10 m2 25ґ нашеня за евентуалне дошеванє. При купованю меркуйце же би нашенє було швиже прето же травово нашенє барз швидко траци ключкавосц (ключкавосц дворочного нашеня нїзша за 50%). При купованю водзце рахунку и о тим же чи нашенє у предавальнї було добре ускладищене (бо кед нашенє влажне або кед даєдни нашенка ключкаю – нє купуйце го. На тот способ заобидзеце нєпотребне розчарованє). Цена нашєня ше у предавальньох руша од 3 с€/кґ (у зависносци од файти). Кед купуєце нашенє виберце сорту у зависносци од того же зач травняк будзеце хасновац (роздумайце чи по нїм будзеце часто ходзиц, чи го будзеце хасновац за активни спорт, або нє плануєце ходзиц по травняку, або го будзеце хасновац лєм за покарму живини). Нїґда нє купуйце нєозначене нашенє!

Озбильни фирми маю информативни лїстки хтори вам помогню при вибору нашеня медзи огромним количеством травових мишанїнох. У каждей добрей предавальнї би вам таки лїстки требали дац на вашо поглєдованє.

Купене нашенє охабце на сухим, жимним и цмим месце. Нє препоручуєме вам же би сце одкладали нашенє за шлїдуюци рок прето же швидко траци ключкавосц.

Шейце нашєне „широке“ у маю (а того року аж у юлу). Скорей шаца з помоцу грабелкох направце браздочки у жеми на глїни коло 1цм.

После шаца поверхносц пороляйце (нпр. зоз ролю) и добре залєйце. Нашенє зиходзи за коло 14 днї. Кед травняк досцигнє 10цм першираз го покошце. Кед после кошеня на травняку найдзеце места без трави можеце их дошац. Кед жадаце достац густи випатрунок травняка кошце го до половки септембра у интервалох од єдного до двох тижньох. Покошену траву нїґда нє руцайце! Пречитайце з увагу текст на остатнїм боку точо числа.

б) за подзвигованє травняка похаснуйце напредок випестовани травово тепихи

То швидши, алє и дацо дракши способ. У каждим случаю повольнєйши прето же у векшини фирмох у хторих можеце купиц таки травово тепихи цена уключує и їх поставянє. Значи, ришице ше своєй роботи повязаней з подзвигованьом травового тепиха. Їх цена ше вєдно зоз кладзеньом руша коло 90–150 словацких крунох/ м2 (у зависносци од файти).

2. пестованє старшого травняку

Каждей яри (у зависносци од хвилї у цеку марца-мая) травняк зоз грабелками очисце од лїсца и сухей трави, а кед потребне дошейце траву.

Травняк през жиму мпаз „вицагнє“, та прето го на яр добре пороляйце. На опоравок травняка благородно дїйствує и аерация жеми. За аерацию можеце направиц єдноставни алат. Пририхтайце 2–3цм грубу деску димензиї 30х30цм. До нєх забийце коло 10цм длуги гвозди же би вишли на други бок. Удалєносц медзи гвоздами би требала буц 2–3цм. Деску зоз гвоздами притвердзце на древену ручку (єй длужина завиши од вашей висини, требала би буц тельо длуга да ше вам з алатом добре роби).

После кошеня заривайце гвозди до жеми так же на деску станєце. Вицагнїце их зоз жеми и поступок повторюйце по цалей длужини травняка. Евентуално можеце хасновац и видли.

Кед жадаце поляц травняк, залєйце го после аерациї. Вода войдзе там дзе потребно – до кореня.

««« Претходни текст: Як ше бориц процив жижка? Шлїдуюци текст: Як правилно кошиц травняк? »»»

пияток 29.12.2023 08:31 | видруковац | Травняк