NOVODOF FC процив кромпльовей златици

Кромпльову златицу (Leptinotarsa decemlineata) вероватно нє мушиме нїкому окреме представяц. Шицки ю знаю як чкодлївца хтора напада кромплї и хтора без хаснованя “хемиї“ практично нєзнїщтожлїва. Медзитим, мало хто зна же нєшка исную и биолошки препарати дзекуюци хторим ше вецей нє мушиме так бац кромпльовей златици.

Одкаль походзи?

Кромпльова златица до Европи принєшена зоз Сиверней Америки. Там першобутно жила на малим просторе у обласци Кордилєра, дзе ше кармела зоз лїсцом дзивих ростуцих помочнїцох. Кед ше кромплї зоз фамелиї помоцнїцох (ботанїцки Solanum tuberosum) почали масовно пестовац по цалей Америки, кромпльова златица прешла зоз дзивих помоцїцох на кромплю. Дзекуюци кромплї тераз є розширена скоро по цалим швеце.

НОВОДОР ФЦ – троянски конь трецого милениюму?

Новодор ФЦ ма 2 % протеинох бакрериї Bacillus thuringiensis ssp. Tenebroinis. Тот род бактерийох знїщтожує лєм лїчинки бубох зоз фамелиї златицох (Chrysomelidae). У заградкарским смислу у питаню углавном буби зоз фамелиї Galerucinae (знїщтожую украсни древа – ясен, йова, верба) и кромпльово златици.

Препарат виволує охореня при лїчинкох спомнутих файтох. После конзумованя попирсканих лїсцох лїчинки преставаю єсц и после 2–5 днї гиню. За лїчинки других файтох препарат безпечни, нє охабя чкодлїви остатки анї на рошлїнох анї у жеми. Знїщтожує лєм лїчинки, док є за одроснути инсекти безопасни; зато ше хаснує лєм процив наймладших лїчинкох.

Же би препарат добре дїйствовал лїчинки муша интензивно єсц, а лїсца муша буц совершено попирскани зоз препаратом и зоз горнього и зоз долнього боку. Зато ше пирска кед нєт витру и кед ше температура руша понад 15 °C. Кед до 12 годзини од пирсканя спаднє диждж, пирсканє треба поновиц.

Препарат ше предава и у малопродайним пакованю, у ПЕ фляшох волумену 100 мл и кошта коло 3€.

Други род тей бактериї знїщтожує лїчинки капустового мотиля и змотавец (препарат Биобит ФЦ) и суньоґох (у нас ше нє предава).

И найлєпша информация за край: плод ше после пирсканя може такой конзумовац!

««« Претходни текст: Садзенє цибулькастих рошлїнох и пресади Шлїдуюци текст: Игелкаста палма (Rhapidophyllum hystrix) »»»

пияток 29.12.2023 08:40 | видруковац | Чкодлївци