Пестуєме буковачу (Pleurotus ostreatus)

Буковача (Pleurotus ostreatus) у остатнї час популарнєйша аж и од шампиньонох. Цо вецей, у одношеню на шампиньони буковача ма єдно вельке першенство – нє можеце ю помишац з отровну желєну пупавку.

Буковача богата зоз витаминами, аминоквашнїнами и минералнима материями хтори чуваю людски орґанизем од дїйства токсичних материйох. Тиж помага при зменшованю уровня холестеролу у креви, а як нїзкоенерґетска пожива погодна и за редуковани диєти. Предпоставя ше же содержи и материї хтори маю антиканцероґене дїйство.

Упутство за пестованє буковачи (Pleurotus ostreatus)

Пестованє буковачи ше окончує на 2 способи – можу ше пестовац або на слами у найлонових мехох, або на фалатох древа.

Пестованє на слами у найлонових мехох

Перше порихтаце сламу. Скорей зашеваня потребно окончиц стерилизацию слами як би ше знїщело бактериї, плєшнєнїну и други печарочки. Стерилизованє можеце окончиц на 2 способи:

1. Сламу положце до векшей судзини (котел, стари гарчок), залєйце з воду и на температури коло 100°C варце 1 годзину. Сламу охабиц най ше охладзи на 20–25°C.
2. Друга (и вельо єдноставнєйша) можлївосц шлїдуюца: сламу положце до велькей судзини, та ю залєйце зоз врацу воду. Слама будзе порихтана за зашеванє кед ше охладзи на 20–25°C. Саме зашеванє супстрата (слами) окончуєме на тот способ же до велького меха зменююцо шоруєме сламу и здробени мицелиюм. Єдно пакованє мицелиюма достаточне зашевац 15–20кґ влажней слами цо одвитує найлоновому меху велькосци 50х100 цм. Кед мех наполнїце заврице го (завяжце). З помоцу жилета або ножа на меху направце 3–5цм вельки рези, коло 10 на 1 меху. Кед будзеце пестовац буковачу у штредку з нїзку воздухову влагу направце менєй дзирки (познєйше за случай потреби направце вецей дзирки). После зашеваня мехи положце до полуциню (так да на нїх нє швици слунко). Идеална температура за пестованє буковачи виноши 15–25°C. Кед температура висша буковача швидше рошнє (на висшей температури ше медзитим и швидше вичерпаю кармлїви материї зоз слами). Прето добре температуру прилагодзиц тому кельо буковачи хвильково жадаце. Кед буковача будзе родзиц вецей як сце у можлївосци хвильково похасновац – пренєшце ю на жимнєйше место. Кед вам потребно вецей буковачи – положце ю на цеплєйше место. Буковача родзи 3–4 мешаци после того кармлїви матеруї у меху вичерпани и потребно пририхтац нову културу (цо ше може посцигнуц и зоз зашеваньом старей слами). Зоз єдного пакованя можеме достац 2–4кґ буковачи.

Пестованє на древе

У природи буковача рошнє на древе лїсцопадних древох. Прето ю можеме пестовац и на стеблу 30–80цм. Можеце похасновац стебла шицких файтох лїсцопадних древох (нє жимжелєних!). Древо би нє требало буц старше од пол рока як є зрезане. Постої вельо можлївосци зашеваня древох зоз буковачу. Битне най буковача будзе директно у дотику зоз древом же би хифи буковачи могли прироснуц за древо. Зоз мицелиюмом оброснути кольчки познєйше заджобнуц по 1/3 до жеми у загради, на месту хторе у полуциню. У случаю суши пирскац их зоз воду. Стебла родза 2–5 роки (у зависносци яке кармлїве древо).

Предаванє пресади буковачи

««« Претходни текст: Черимоя (Annona cherimola) Шлїдуюци текст: Доган (Nicotiana glauca) – перспективна балконска рошлїна »»»

пияток 29.12.2023 08:14 | видруковац | Печарки