Доган (Nicotiana glauca) – перспективна балконска рошлїна

Доган (Nicotiana glauca)

Людске намаганє за дачим новим, нєобичним и нєтрадиционалним безконєчна. Так и кажди заградар у своєй загради жада пестовац дацо нове, дацо цо по тераз нїхто нєма… Прето тоу причину тарґовище квеца кажди рок понука вельо новитети як би „загашел смяд“ заградаром хтори нє преривно ше намагаю за дачим новим. Комерциялни лансираня нових файтох ше барз розширя и новина постанє лєм часц „обичного сортимента“.

Доган (Nicotiana glauca)

Остатнї даскельо децениї найвекше число квецових новинох приходзи зоз фамелиї помоцнїцох (Solanaceae). Найпознатши петониї, сурфиниї, million bells (у преводу милион дзвончки). Тайна їх успиху у швидким росту, вчасним периоду квитнуца, (у случаю пестованя зоз нашеня квитно до 3 мешаци, у случаю розмножованя зоз пресади квитню практично такой) и при їх досц малих вимогох цо ше условийох дотика. Найвецей им, розуми ше, одвитую слунковити места, алє барз добре подноша и менєй шветла и жимнєйши места.

Медзитим рошлїни зоз фамелиї помоцнїцох у наших крайох нє були вше найлюбенши. Здогаднїме ше наприклад кромплї и парадичи хтори на початку були пестовани як украсни рошлїни. Кед ше зявели перши вистки же ше тоти рошлїни можу и єсц, людзе ше одношели ґу нїм з вельку дозу нєдовирия. Алє пошвидко ше нательо розширели же на велїх местох поцисли класични плоди и постали основна часц костираня.

У тим чишлє упознаме ше зоз доганом (Nicotiana glauca) – нєтрадиционалним балконским древом з походзеньом зоз южней Америки. У наших условийоху питаню черяк або древо хтори швидко рошню. Доган хтори достати зоз нашеня квитка за лєм 2 мешаци, док конари на одроснутей рошлїни за мешац днї вирошню за 50–70 цм. Як єй латинска назва дава до знаня, цала рошлїна ма стрибернасту блїщатосц. Прето мушиме водзиц рахунку же би зме рошлїну безпотребно нє дорушовали прето же ше стрибернаста блїщатосц зоз дотиком лєгко знїма и рошлїна остава нєатрактивно блядожелєней фарби. Лїсца стрибернасти, вайцастей форми и на концу шпицасти. На краю конарох рошню мали квети зоз 20–40 жовтих трубистих квиткох. Квитки длуги 3–3,5 цм и широки коло 0,5 цм. На початку квитнуца вони блядожовти и маю блядожелєни рубци; после квитнуца су цможовти.Як першенствено о тей сорти постої факт же квитки и после квитнуца нєпреривно декоративни. За розлику, наприклад, од петонийох, после квитнуца затримую форму и на рошлїни оставаю досц длуго.

Пестованє тей файти барз єдноставне. Доган (Nicotiana glauca) можеце през цали рок тримац у квартелю, лєбо го през лєто можеце виняц на балкон, односно до заградки. Розмножує ше зоз нашеня хторе барз ключка и ма барз високу ключкавосц. Рошлїна почнє квитнуц уж за 2 мешаци (значи, кед жадаце же би вам украшовали балкон од 15. мая пошейце их у половки марца). Рошлїни можеце през жиму тримац у квартелю або на жимнєйшим месце (алє шветлим) як и мушкатли. На концу прежимйованя им треба скрациц конари на поли и почнїце зоз богатим залїваньом. Доган почнє квитнуц отприлики за мешац днї после прежимйованя. Тоту файту догану можеце лєгко формовац як древо хторе можеце тримац у квартелю. Нє може ше розмножовац зоз пресади прето же чежко пуща корень (цо нє велька препрека прето же ше лєгко розмножує зоз нашеня).

Цо ше дотика кармлївих материйох – доган нє вельо глєда. За доставанє богатих квиткох доган можеце гноїц зоз стандардним гнойом за балконске квеце зоз векшим количеством фосфора.

««« Претходни текст: Пестуєме буковачу (Pleurotus ostreatus) Шлїдуюци текст: Як ше бориц процив жижка? »»»

пияток 29.12.2023 08:22 | видруковац | Еґзотични рошлїни