Як ше бориц процив жижка?

Предпоставям же жижок нїкому нє мушиме окреме представяц. У питанє дробни бубки (3–4мм) зоз хторима ше у кухнї, у нашеню махунарки стретнул кажде з нас. Тоти чкодлївци ше розвиваю у нашеню шицких махунаркох. У сущносци кажда файта маунарки ма свой „власни“ жижок: пасуля – пасульов, гращок – гращков, сошиво – жижок сочива, боб – бобков жижок,…

Нападнуте нашенє на местох дзе виєдзени ходники удубене, а кед ше вилягню одроснути буби у нашеню находзиме дзирки. Даєдни файти (нпр. Пасульов жижок) найвецей прави чкоди аж при складищеню (аж теди ма идеални условия за живот), без огляду на тото же до нападаня приходзи ище у преградкох у загради. Борба процив жижка на щесце барз єдноставна и ефикасна (ефикасносц 100%)!.

Такой после обераня мауни зоз узретим нашеньом очисце. Преверце чи ше у нашеню находза очкодовани зарна хтори такой рудзце (найефикаснєйше спалїц их).

Жижка у нашеню Erythrina lysistemon

Нашенє положце до мещка (найлонови або платнови) хтори на шлїдуюци 48 годзини положице до змаржляку. З помоцу тей процедури унїщице шицки розвойни фази жижка. Кед нашенє винєце зоз змаржляку розпрестрице го на папер и охабце на хижней температури 2–3 днї най ше добре осуши. Нашенє можеце похасноване тримац у мещку. Так ускладищене нашенє може нападнуц лєм жижок хтори ше находзи у нашеню купеним у предавальнї.

Прето ище лєпше нашенє маунох тримац у дунцу зоз заверачом. Нашенє муши буц зошицким сухе прето же би иншак сплєшнєло. Так можеце буц сиґурни же нашенє нє нападнє нови жижок.

Процив жижка ше можеце бориц и зоз одвитуюцим вибором сорти. Постоя сорти хтори жижок нє дума же су смачни.

««« Претходни текст: Доган (Nicotiana glauca) – перспективна балконска рошлїна Шлїдуюци текст: Пестованє нового травняка »»»

пияток 29.12.2023 08:27 | видруковац | Чкодлївци