Пестуйце штиролїсцасти водови папрат за щесце – штиролїсцата рижнородка (Marsilea quadrifolia)

Штиролїсцати рижнородки (Marsilea quadrifolia) то водови папрат з лїсацами хтори випатраю як штиролїст. Видзи вам ше же водови папрат и штиролїст нє маю нїч зайеднїцке? Напроцив, обидва слова одлично гарактеризую нєобичну, барз декоративну и у заградкарству практично нєпознату рошлїну.

Рижнородка ма други виросток хтори здабе на шнурку. Зоз стебла рошню лїсца хтори плїваю на поверхносци води и хтори роздзелєни на 4 правилни лїстки и на перши погляд здогадую на штиролїсцату бетелїну. Вєшенї, кед ше виростки винїмаю зоз води можеце видзиц мали „привязки“ велькосци меншого зарна пасулї у хторих скрити спори – та пре тото заключуєме же у питаню папрат. Рошнє у природних и штучних водох хтори богати зоз кармлївима материями, и то на шицких континентох окрем у Южней Америки. Була принєшена до Сиверней Америки за хтору ше дума же є инвазиона файта. У Польскей у природних станїщох вимарла. Пробує ше репродуковац нпр. При Ґочауковицким озеру. У Словацкей рошнє на 7 местох при рики Латорици. Скорей ше зявйовала и у околїску рики Бодроґ, Лаборец и Ух. У Чешкей нє рошнє.

У тропских крайох рошню даскельо други подобни файти; вони медзитим термофилни и прето су нє вигодни за пестованє у наших условийох. Даєдни з нїх ше пестую у аквариюмох.

Штиролїсна рижноротка (Marsilea quadrifolia) то култивована и барз подзековна файта хтора будзе задовольна гоч у якей судзини наполнєней з воду и зоз кус глїни на дну. Без проблема ю можеце пестовац у судзини димензийох 20х20х10 цм. През цали рок ю можеце тримац вонка (нє змарза ше). Дзекуюци свойому лєгкому пестованю може ю пестовац гоч хто и гоч дзе (поведзме у малим валове або черепу без дзиркох на дну, на приклад на вонкашнєй часци облака).

За пестовательох з огранїченима просторнима можлївосцами идеалне ришенє пестованє у валовох за мишанє малтеру (достаточно коло 5цм глїни на дну). Кед судзини наполнїце по верх з воду, своєй рижноротки обезпечице идеални условия за живот.

Таки валов можеце укомпоновац як до жимскей заградки, так и у квартелю такой при облаку (идеално балконским), же би рошлїна була на найслунковитшим и найцеплєйшим месце у квартелю. През лєто валов можеце винєсц на южно ориєнтовани балкон або до заградки.

Рижноротка будзе найбаржей у центру поваги у заградковим озеру, дзе досц положиц дакус иловачи зоз загради на дно и до нєй захпац малу часц виростка рижнородки. За рошлїну ше нє мушице старац – знайдзе ше сама. Рижноротка ше тиж сама прилагодзи ґу уровню водовей поверхносци; цо ше дотика квалитету води – нє глєда окремну вимогу. Можеце ю пестовац у води на рижних глїбинох (5–100 цм). Длужину стебла рижноротка прилагодзи спрам глїбини води так же би єй лїсца плївали на поверхносци.

Найлєпше ше розмножую зоз дзелєньом виростка. Достаточно мац мали виросток (10 цм) и през лєто ше вам на поверхносци води формує „травняк“ штиролїсного папрату.