Индийски лотос (Nelumbo nucifera)

Индийски лотос (Nelumbo nucifera) то любка водова рошлїна, хтора ма тлусте округле шивожелєне лїсце и целово квитки. Будисти ю хасную у своїх ритуалох, цала рошлїна за єдзенє (конзурмую ше насампредз нашенє и корень), хаснує ше у готовеню рижних єдзеньох у цалей юговосточней Азиї. То мочварна рошлїна хтору можлїве пестовац як локвань. Пестованє лотоса у нас вообще нє компликоване, єдино треба знац як то зробиц.

Нашеня скорей садзеня треба дакус обрушиц прето же их поверхносц гладка и нє препущує воду. Нашеня прето нє можу почац процес ключканя прето же вода нє може войсц до нїх. Нашенка би без брушеня зачували свою способносц ключканя тисячами роками, а кед би сце их без брушеня намочели до води, мушели би сце їх ключканє чекац даскельо роки.

Як будзеце знац чи сце их у достаточней мири обрушели? Кед сце их достаточно обрушели нашенє ше у води у чаше од 24 годзини дупло звекша. Кед ше то нє случи, нашенє обрушце ище кус. И поново, кед же ше у чаше од 24 годзини дупло нє звекшаю, поново брушенє и потамаль док ше то нє случи.

Потребна им лєм вода… Чим обрушице нашенка, положице их до судзини з воду. И при температури коло 20°C нашенка ше у чаше од 24 годзини дупло звекшаю. Идеална температура за початок процеса 27–28°C. При тей температури ключканє ше одбува барз швидко и у чаше од єдного тижня добиєце рошлїну зоз лїсцами.

После випукованя першого лїсца, добре би було рошлїну засадзиц або до мочарного супстрату або до шлюнку (хтори ше хаснує за аквариюми) и цалу рошлїну положце до векшого количества води (аквариюм, озерко) зоз глїбину голєм 30 цм. Кед же хаснуєце супстрат шлюнок за аквариюм, лотос можеце пестовац и у аквариюму зоз рибками.

Поступнє, як рошлїна рошнє, будзе сцец векши простор. Можеце ю пестовац у озерчку у жимскей загради, склєнянику и подобне, дзе нєт мразу. Идеална температура за пестованє 20–35°C, алє на наших просторох тота температура у жимским чаше будзе блїзша долнєй гранїци, цо лотосу нє завадза. През лєто лотос можеце винєсц вонка кед условия таки як цо су описани, алє през жиму ше муши уношиц – по нужди през жиму лотос мож тримац и у векшей пиньвици, подобно як и локвань.

Идеалне ришенє за пестованє лотоса то так волани бетонски кадочки (дума ше на пластични кадочки хтори ше хасную за продукованє бетону, єст их од 60, 80 литри и коштаю коло 10 евра). Рошлїну будзеце тримац у даєдним супстрату (блато або шлюнок зоз аквариюму) у черепу и шицко вєдно положице до кадочки.Кед же ю наполнїце з воду поверх, обезпечице идеални условия за рошлїну. Першенство того то же кадочку можеце тримац и у жимскей загради алє и у квартелю, блїзко облака (найлєпше при балкону) же би рошлїна була на цо цеплєйшим месце, односно там дзе єст найвецей слунка. През лєто цалу кадзочку можеце пренєсц на южни бок балкона або до заградки. Як видзице, лотос можеце єдноставно пестовац аж и кед жиєце у стамбеним будинку.